Ng Kmal Sebeched el Oumera ra Dios

A Mark a melekoi el kmo, “AK MLE BLECHOEL EL OLTUTUUB ER A DIOS.” Meng di, tiang, a di mlo ngodech er sera lsebek a skoki er ngii el soiseb ra chelsel a klou loiu ra yuki ra milkelkang, e olengesonges a cheluchul, el diak el sebechel mor tial kekerei el skozio ra delongelel a Alaska ma Arctic. Tial skoki er ngii a mla suebek el kmeed lokedei el bung el di bechachau a cheluchul, meng mocha melebtub a mesil er ngii. Ma Mark a mocha mengetmokl er ngii el mo metemall ra chelsel a daob ra Bering Sea. Meng nguleltuu a telil, e kor omdesuang er a mo ulebongel techellel. Ng kmal dirkak a tal loluluuch. Meng di ng melechesuar el dikea cheldechulel a rokui el tekoi er ngii. Meng mocha meluluuch ra chelsel a rengul el kmo, “A lsekum ngar er ngii a Dios, ea kuusbech a ngesou er kau er chelechang!”

         Meng di mle mereched el tuobed tial skoki ra chelsel tial klou loiu ra yuki. E ngii el Mark a mocha obengelii a ta ra chetituokel tekoi, Ng kirel suebek ra 20 el mile el diousbech ra bechachau el tangk ra cheluch! Ma bocha lemetengel ra skozio, eng dimlak a ngii di luchul ra klechad, e blo lsebechel tial skoki er ngii, el suebek ra ua cherridel tiang el di diak a cheluchul. A Mark a uluumerang el kmo, a Dios a dilechelir a tal zikang el cheluch ra tengkel. Meng tekingel el kmo, “sera bek metengel ra skozio, e ak mla mo ngodech el chad. Ng dimlak Keristiano, ng di kmla mo oumera ra Dios.” A Mark a mlo melebedebek ra delal mechas, el Keristiano ra chelsel tial ongalek er tir. “A Grandma a meral tekoi a lolekoi. Ngar er ngii a Chelid [Kmung Techang] el ngar tial melidiul.”

Te betok el chad a ua Mark, el meringel er tir lomdasu el kmo, ngar er ngii a Dios. Ng blechoel a chad el mo obengelii a teletael el kirel a kodall, ma lechub eng klengar, e mochu sebechel loterekeklii a uldesuel. Ea rekuk bebil a kmo, ng tekoi ra cheroll a mult a uldesuir. Le sel lomes er ngkal kekeremus el ua siasing er tir; e  cherrungel el tolechoi el chad el ngara dukkelel, el mle etiu el buil lomekeroul er ngii ra diil; eng meringel dolekoi el kmo, ngkal kekeremus el tolechoi a kuk di mlor ngii! Ma delal ma demal, sel lomes er ngii el meleu a cheltngelel a chimal ma ochil e bo le klikmechur, e lesang a deuil a rengul sel lomes er tir, e ldengcheterir, eng rulleterir a rebetok el chad el mo melebedebek el kmo—Ng locha ngar er ngii a Dios? Ngar er ngii a Ulemeob?